Ig fröiemi sehr dasi cha am Loufmeter 17 in Bärn drbi si. Das wird mini erschi chlini Kollektion si wo ir zämerarbeit mitr Bärner Textil designerin Mira Durrer isch entstande. Mir wärde e mix zwüsche irne Gwäb (wosi uf irem Wäbstueu wäbt) und zertifizierte Stöffer präsentiere.

Es wärde Chleider us Bambus, Boumwule, Siide und Bananefasere härgsteut. Mir ischs wichtig, dass d Umwelt so weni wie müglch belastet wird, drum schaffeni wenn immer irgndwie müglch mit zertifizierte Stöffer usere GOTS Produktion, oder grad Boumuwl wo ohne Pestizide gwachse isch.

Ig interessiere mi ou für nöi Stöffer, grad us Abfau materiau wie z.b. die bananefasere es gmisch zwüsche “peacesilk” und bananefasere.

D Idee vor Kollektion isch chli dr Stil vode 20er Jahr inedsnä, wiiti schnitte, längeri Chleider und chline Luxus im alltag. Aui Chleider und dr eint Hoseaazug wärde eher läng und wiit si, mit fliessende, aagnäme Stöffer.

Ig ha aui Gwäb natürlch belasse odr vo hand gfärbt oder bedruckt. Für teu Chleider hani e Marmordruck vo Hand gmacht, mit Zuetate usdr Apotheke wo guet abbaubar si und dr Umwält nid schade.

Am 20. Mai fingt das ganze ir Altstadt Bärn statt, abde 2 am Namitag isch d show, vom 11-18 fingt dr verchouf im showrroom im Lorenzini statt.